Abstract
Nepokgolo ya nyakišišo ye ke go tšweletša ka fao bangwadi ba dipadi tša Sesotho sa Leboa tšeo di kgethilwego; Kgalagalo tša Setu ka M.S Machitela (2016), Ra Tla ra Lokologa, Eye!, B.M.T Makobe le M.G Mabye (2009), Lenong la Gauta, H.D.N Bopape (1982), Mahlatse a Madimabe, O.K Matsepe (1981) le Ngwana wa Mobu ka S.P.P Mminele (1966), ba šomišago matlakalantle a dingwalwa tša bona go fetišetša moko le melaetša go babadi. Se se ra gore matlakalantle a tšweleditšwe ka mokgwa wo e lego gore mmadi a ka kgona go akanya goba go ba le ponelopele mabapi le diteng tšeo di ka bago gona. Gape a kgatha tema ye bohlokwa go thuša babadi go kwešiša mohuta wa sengwalwa, dimelo tša baanegwa gammogo le thulaganyo. Matlakalantle a padi a bopilwe ka diponagalo tša polelo tšeo di hwetšwago godimo ga ona, le dielemente tša dingwalo go akaretšwa moko wa ditaba, setaele, le mohuta wa sengwalwa wo o ka lemogwago ka thaetlele.
Lengwalophatišišo le, le sekasekile dipadi tše hlano tšeo di kgethilwego ka tšhomišo ya teori ya setaele le ya semiotiki go sekaseka kamano magareng ga matlakalantle le diteng tša dipadi. Thutanyakišišo ye e šomišitše mokgwanyakišišo wa khwalithetifi go sekaseka tshedimošo yeo e lemogwago go matlakalantle, bjalo ka, dithaetlele, diswantšho le mebala go laetša kamano magareng ga matlakalantle le diteng tša dipadi. Kgetho ya diswantšho le mebala di hlathollotšwe ka go utolla ditlhalošo tšeo di lego ka morago ga tšona go ya ka kwešišo ya monyakišiši. Lengwalonyakišišo le le hweditše gore go na le kamano magareng ga letlakalantle le diteng tša padi. Ka letlakalantle, babadi ba ka dira dikatlholo tša diteng tšeo di ka bago gona. Lengwalonyakišišo le gape le hweditše gore bangwadi ba šomiša matlakalantle go fetišetša melaetša ya tlhalošo ya kgonthe le seswantšhetšo. Ka gona, ponagalo ya nyakišišo ye e theilwe godimo ga mmolelwana wo; ‘letlakalantle la padi bjalo ka khuetšo ya polelelopele ya diteng tšeo di ka bago gona.’
Mareo: letlakalantle, dingwalwa, Sesotho sa Leboa, semiotiki, setaele, thaetlele, seswantšho, morero, tikologo